India News

CAA:’അവരെന്‍റെ കൺമുന്നിൽ വെച്ചാണ് അച്ഛനെ വെടിവെച്ച് കൊന്നത്’; മംഗളൂരുവിൽ കൊല്ലപ്പെട്ടയാളുടെ മകൾ പറയുന്നു

സ്കൂളിൽ നിന്ന് വരികയായിരുന്ന കുട്ടികളെ കൂട്ടി വീട്ടിലെത്തിയപ്പോഴായിരുന്നു പോലീസ് വെടിവെയ്പ്പ് ഉണ്ടാക്കുന്നത്. ഇടതു കണ്ണിന് വെടിയേറ്റ് ജലീൽ വീടിനു മുന്നിൽ തന്നെ വീഴുകയായിരുന്നെന്നാണ് റിപ്പോർട്ട്.

മംഗളൂരു: പൗരത്വ നിയമ ഭേദഗതിയ്‍ക്കെതിരായ പ്രതിഷേധങ്ങൾക്കിടെയുണ്ടായ പോലീസ് വെടിവെയ്പ്പിൽ മംഗളൂരുവിൽ രണ്ട് പേരായിരുന്നു മരിച്ചത്. ഇതിൽ ജലീൽ എന്ന 42കാരന് വെടിയേറ്റത് വീടിന് പുറത്ത് നിൽക്കുമ്പോഴാണ്. ഇടതു കണ്ണിന് വെടിയേറ്റ ജലീലിന് ജീവൻ നഷ്ടപ്പെടുകയായിരുന്നു.

സ്കൂൾ ബസിൽ വന്നിറങ്ങിയ കുട്ടികളെ വീട്ടിലെത്തിച്ച് നിൽക്കുമ്പോഴാണ് വെടിയേൽക്കുന്നതെന്നായിരുന്നു റിപ്പോർട്ട്. അച്ഛൻ വെടിയേറ്റ് വീഴുന്നത് താൻ കണ്ട് നിൽക്കവെയായിരുന്നെന്ന് ദേശീയ മാധ്യമത്തോട് പറഞ്ഞിരിക്കുകയാണ് ജലീലിന്‍റെ മകൾ.

കൂലിവേലക്കരനായ ജലീലിന് രണ്ട് മക്കളാണുള്ളത്. 14 വയസ്സുള്ള ഷിഫാനിയും 10 വയസുള്ള സബിലും. സ്കൂൾ ബസ് കുട്ടികളെ പാതിവഴിയിൽ ഇറക്കി പോയതിനെത്തുടർന്ന് അവരെ കൂട്ടാൻ ജലീൽ പുറത്തേക്ക് പോയിരുന്നു. മക്കളെയും കൂട്ടി വീട്ടിൽ തിരിച്ചെത്തിയപ്പോഴാണ് പോലീസിന്‍റെ വെടി ഇടതു കണ്ണിനേൽക്കുന്നത്. ഉടൻ തന്നെ ആശുപത്രിയിലെത്തിച്ചെങ്കിലും മരണം സംഭവിച്ചതായി ഡോക്ടർമാർ സ്ഥിരീകരിക്കുകയായിരുന്നു.

‘അവരെന്‍റെ അച്ഛനെ എന്‍റെ മുന്നിൽ നിന്നാണ് കൊന്നത്’ ജലീലിന്‍റെ മകൾ സംഭവത്തെ ഓർക്കുന്നു. കൊലപാതകത്തിൽ പോലീസിനെ കുറ്റപ്പെടുത്തിയ കുട്ടി വാക്കുകൾ കിട്ടാതെ വിതുമ്പുകയായിരുന്നു. ജലീൽ ഡിസംബർ 19 ന് മംഗളൂരുവിൽ നടന്ന പ്രതിഷേധങ്ങളുടെ ഭാഗമായിരുന്നില്ലെന്ന് അദ്ദേഹത്തിന്‍റെ കുടുംബവും പറയുന്നു.

സംഘർഷവുമായി ബന്ധപ്പെട്ട് പോലീസ് തുടക്കത്തിൽ നടത്തിയ വാദങ്ങളെല്ലാം തെറ്റായിരുന്നെന്ന് ജലീലിന്‍റെ ബന്ധുവും പറഞ്ഞു. ‘7,000 മുതൽ 9,000 വരെ ആളുകളുള്ള ജനക്കൂട്ടമെന്നായിരുന്നു പോലീസ് ആദ്യം പറഞ്ഞത്. എന്നാൽ 50 നും 100 നും ഇടയിലുള്ള ആളുകൾ മാത്രമേ അവിടെയുണ്ടായിരുന്നുള്ളു.’ ചെറിയ ആൾക്കൂട്ടത്തെ വരെ നിയന്ത്രിക്കാൻ കഴിയാത്ത പോലീസ് നടപടിയെ അദ്ദേഹം വിമർശിച്ചു.

മംഗളൂരുവിൽ നടന്ന അക്രമ സംഭവങ്ങളിൽ രണ്ട് പേർ മരിക്കുകയും അമ്പതോളം പേർക്ക് പരിക്കേൽക്കുകയും ചെയ്തിരുന്നു. സംഭവത്തിന്‍റെ പിറ്റേദിവസം പോസ്റ്റുമോർട്ടം നടപടികൾ റിപ്പോർട്ട് ചെയ്യാൻ പോയ കേരളത്തിലെ മാധ്യമപ്രവർത്തകരെ മംഗളൂരു പോലീസ് കസ്റ്റഡിയിലെടുക്കുകയും കേരളത്തിലേക്ക് തിരിച്ചയക്കുകയും ചെയ്തതും വാർത്തയായിരുന്നു.

Related Posts